عالمى فى منتهى الضيق , ليس من صغر حجمة , العالم يجب ان يسع للمزيد من ذلك
لا يروق لي ألوان الحوائط تلك , لا يرضينى ما يراه جيرانى من نوافذى عن عالمى الفوضوى
جميعنا نملك نوافذ نظهر لمن نريد ومن لا نريد جزأ معين من حياتنا , كل منّا حسب رغبته , لكن لا أحد يمكنه أن يبقى نوافذه مغلقة دائما
أملك أبواب موصودة وخزائن تحت الارض وداخل الحوائط أخفى فيها من لا يريد ان يدركه العدو قبل الحبيب
أملك مقاعد للزائرين ! أنا فقط من اقرر عددها وأصحابها , نعم نحن نتحكم فى زائرين عالمنا
غالبا مانقترف ذلك الخطأ الفادح !!
أن يكونوا أناس يلقوا على سمعنا ما يرطب اذاننا , يحضرون معهم ما يسر أعيننا
لذلك يبقى أغلبنا هكذا فى عالم جليدى لا يعرف ربيعا ولا يري شمس أغسطس
لذلك بقيت سنوات هنا ! لا أحد يقترح عليا ترتيب دولابى , ولا تعديل أضائتى , لا أحد يحضر شرابا جديدا , او مقطوعة موسيقيه غير مألوفه ! لا أحد يصحبنى للخارج ! فى حلم يقظه قصير رأيت من فى عالمى قطع شطرنج ! انا من أعطيهم الأماكن المحددة للوقوف ! أنا من أحركهم , انا موزع المسؤليات ! هذا وزير وهذا جندى ,
لم يحدث وأن أخترق جندى القواعد وأعلن التمرد , ومن يبدى ما لا يرضينى , يكون مصيره الخروج !
حقاّ لم أكن أشعر بالملل كثيرا قبل أن أراها , لم أكن أعى معنى التغير ! تغيير ماذا ؟ أيوجد حقا شئ غير هذا ؟
هذا هو الطعام , هذه هى الالوان , هذا هو العشق , هكذا يكون العالم !! كيف يمكن ألا يكون هكذا
نرى بعضنا البعض من نوافذنا ! لم أكن فضولى , الفضولى هو من يبحث عن الجديد المختلف ! وانا أصلا لا أعى ان هناك جديد أو مختلف !
ولكن رأيت جزأ من عالمها , جزأ بسيط كعادة جيران العوالم المجاورة ,
حقاّ لم أكن أشعر بالملل كثيرا قبل أن أراها
رايتها , فيها ما لم يعلمه عقلى من قبل ! لم أستوعب ما المختلف بعد , طبيعة الاختلاف دخيلة على
لما أفهم تحديدا ما ألهمنى الخروج ! نعم خرجت ! للمرة الأولى من الولاده , لم أفارق تلك الكراكيب منذ قرابة العشرين وأكثر
جلسنا فى مكان مشترك بيننا فى عوالمنا , مكان مورود , له رائحة , مضئ بشكل أجبر حدقتيا على الاختفاء
يقيناّ هذا من صنع عالمها هى ! انا لم أرى هذا من قبل عندى ! المساحة مشتركة , قد أكون انا من أملك الارض أو الاثاث , لكن حتماً هى صاحبة النور والورود والفرشات والطيور تلك على الأغصان !
لا أتذكر البدايات , أستخدمت كل طاقتى فى أستيعاب الكم الهائل من التغيرات !
أسمع أغانيها من هنا ,غير تلك التى تلعب فى عالمى ! أرى ألوان غير الالوان ! أرى أناس غير ذات الاوصاف ,
غريب أنا هنا , ولكن أشعر بحب غريب ف أن ابقى هنا !
لم أكن أشعر بالملل كثيرا قبل أن أراها ,
بقيت معها , كثيرا , علمتنى كيف أخرج أشياء افضل من حقل الكراكيب ذلك ! بالفعل بدأت المساحة المشتركة بيننا تتغير المعالم , أنتقيت الافضل مما أملك ,يبدو أنى كنت أملك أشياء جيدة نسبياَ
مبهرة هى, جدا جدا ! سريعا ما تغير شكل حقل الكراكيب -من يوم ميعادنا وانا لا أطلق عليه عالم - بعض التغيرات فى رفوف الكتب , قائمة الاغانى تتجدد بأستمرار , قائمة النزهة الرتيبة أضيف اليها المزيد
خصصتلى جولات فى عاولم جيرانا القرابى والبعاد , زرت الكثير , رأيت الكثير , تعلمت الكثير , أحببت أكثر مما كنت أظننى أستطيع
لم يكن كسابق شعور أحسه قلبى , لم تكن كتجاربى من قبل - من يوم ميعادنا وانا لا أطلق عليه حب - أحببت شعورى ذاته بحبها
زوارى جميعهم أبهروا من تغيرات عالمى ! منهم من لم يتقبل ورحل -لم أحزن- ومنهم من تملقنى وأشاد , ومنهم من بقى كما هو لا يبدى أى شئ
تقبلت الجميع , فى تلك الزيارة عند احداهم , كان هناك من يستقبلون بعضهم بالأحضان , فى جلسة العشاء الاخيرة تناقشنا فى موضوع لم يناقش فى مجلس كهذا من قل !
أتوقع بطفرة جينية قد حدثت لدماغى جعلتها متقبلة كل هذا التغير بعد ما كانت لا تعرفه من الاساس , قلبى أحب ذلك , وساعدنى
وما اتى كااان أعظم , دائما ما كنت اتوجس فى دخول العوالم تلك خوف ان أٌهمل , لم أكن اخشى ان ارى ملا يرضينى , كنت أتيقن ان كل العوالم مثلى هكذا !
اخطأت , يبدوا أنى لم أكن أحيا !
أنا حى بفضلك , أنا ارى النور من عينيك , انا قادر على التفكير , على التغير , على الحب
أنا قادر على كل ذلك الحب , لم أكن أعلم انه بمقدورى , ولكن حدث
" الزنزانة دى مبنيه من قبل الكون " محاولة نسيان اسمى شئ محتمل مقارنة بنسيان جملة زى دى ! ازاى ممكن انسى مكان بلعنى ايااام ؟! قادر استوعب كل تفاصيلة , وحشته وضلمته وسكونه وبرده وحياطانه وبابه المسوجر ارضه اللى رفضت تريح عضمنا ساعة ! فاكر صوت علاء بيقرا سورة الواقعة ! فاكر عم ابراهيم بيبض الزنزانة بضحكة بيضه من وش اسمر ! فاكر محمد ورقدته جمب الباب " كأنه حتى رافض فكرته وجوده فى المكان" 16 سنة مكانه مستحيل هنا ! زنزانة مسجورة فى طرة ! مش ممكن شقاوته ولا جنونه ولا اهماله لدراسته تبقى دى عواقبها ! 16 سنة ايه اللى ممكن يكون اذنب فيه اكتر من كدة ؟؟ لا ذنب هنا ! لا فرق هنا ! لا فرح هنا ! محاولات كتيرة لزرع ضحكة تعدى ساعات يوم طويل , اطول من ساعة وقوفك فى الملكوت ! الارض بور ! والضحة بتموت وهى لسة ببتغمس ! الشمس طالعة حتى تنتقم ! ملعون انت ياللى واقف فى مجالها , الدفا برا , لاشئ هنا الا الجحيم ! مشوفتش ليل ! يمكن مجاش يمكن عتمة الزنزانة اضلم منه ! يمكن ! الصحبة ساعدت على تقسيم المرار , بس المرار كان محتاج شعوب هتلر عشان تشيلوا بنفس راضيه ! السجان اواصفه ذات نفس الاوصاف , حاجظ , متفقع , لاعنك فى كل زفير ! لعلك شوفت نوع ابعد للانس اقرب لشيطان ! جيبت منين قوة تكتب ع الحيطان يا سجين !! جيبت منين املك ! جيبت منين حيل ترسم وتشكل خطك "اذا كان في العمر بقاء فلا بد من اللقاء ٧/٨/١٩٩٧ إلى ٧/٨/٢٠٣٧ " املك مدود يمكن اطول من عمرك ! الطاقة اللى هناك ابدا ابدا مش شباك ! لاشئ هنا الا الجحيم ! والجحيم قاعر بلا شبابيك ! خايف من ايه يا عم السجان ! قافل قفلين وتلاتة وخمسة على حبة عزل هكع ؟؟ اتلهى ع عين جهلك وامشي ! غوور من وشي ! وانت يا سيدى ياللى موقنا اتنين اتنين ! وكاتبلى على لوحة رقمى ! خلاص اثبت لتوك انى سجين ! مش ناقص غيرك تيجى تقولى ! اضحك فى الصورة !! يا كلاب مسعورة !! الغنوة بتعلى من جوة زنزانة ! غنوة تشدك ! غنوة تهزك ! غنوة تفكرك بجنونك برة القضبان ! بسأل صاحبى " تفتكر يمكن عرفه الحكاية ؟؟ اهلنا برة دنيتهم احوالها ايه ؟ بصلى فى استغراب شديد ! اسألنى عن حال دنيتنا دى ! لا دنيا هنا ! لاشئ هنا الا الجحيم !!
كيف
لا يستطيع ان يحسم كل الاسئلة التى تموج فى راسه؟؟ , عاصفة كل الخيالات المريضه,
تمطر ك السيل على ما تبقى من يقينينات وثوابت دلخله !
هل اعانى من الشيزوفرينا ؟ هل فقدت السيطرة على شيطانى المارد اللعين ؟؟ هل يمكن
ان يكون ذلك طبيعيا ولو بنسبة 1% ؟؟
من الممكن ان يكون معروفا ان لا انسان بلا
تناقضات , يحمل الخير والشر داخله , ولكن الفيصل دائما هو قدرته على حسم مصيره
واتخاذ قراره الحاسم معلانا انتصار ايهما
, بذيع فى بوق الحلبة معلنا سيطرة احداهما على ذمام الامور
ما اصعب ان يحتدم صراعك الداخلى , لوكنت
مقتنع بفعل تمارسه فلن يشكل ذلك عليك ضغطا , ولو كنت مقتنع بعدم جدوى فعل لا
تمارسه سيشبه ذلك ايضا تقديمك نصيحة لمخمور بترك الخمر في حين انك لم تقربها قط !
حدثنى اكثر عن من يقرب الزنا وهو على يقين
بحرمانيته ! عن من يترك الصلاة وهو علم بانها الوسيلة الى الهدى , عن من يكذب على
الناس ويكره الكذابين , من يشيط من رؤيا متحرش ويمارس عاداته السرية بصفه شبه
منتظمة
كيف يبدو صراعه ؟؟ هل ترواده مضاداته اللعينه
على فترات بعيده ؟؟ هل يصلى شهر ويكفر شهرا ؟؟ هل يكذب يوم ويصدق الاخر ؟؟ هل يزنى
ساعة ويلعن التحرش ساعة ؟؟
مابالك لو كان دماغه سيارة ضخمة تجر عربتين
محملتين افكارا شبه القنابل , بلا سائق ؟! لا , توجد فى غرفة القيادة سائقين ,
احدمها يمثل افكاره الرزينه –دائما ما يتأنى فى سيره , يحسب خطاه وسرعته , أمين لا
يغمض له جفن , الاخر – مخموور , شهوانى , ترواده صور العاريا على زجاج السياره , مسرع
غير مكترث بشئ قط !!
هل يتولى كل منهم القيادة لفترة ما ؟! لا !
انهم يقودون معأ , مرتكزين على عجلة القياده فى ان واحد , متشبسين بها ك غارق
متعلق بقشة فى عرض المحيط , رافضين التفاهم والتحاور كأعضاء احزاب تتصارع فى برلمان
هزلى , تبأ !! ماذا يكون خط سير تلك السيارة الملغومة ؟؟؟
فللتقرر ايهما يتولى قيادة "دماغك"
اللعين !! فلتحسم تلك المسأله !! فلتضع واحدا –ايا ما كان – داخل عربة القيادة
والاخر اسفل عجل السيارة الضخم !!
عزيزى قارئ النظرية , هل تعلم ان نظرتنا للاشياء بتختلف
بـ............
لالالالا مش بالمسافة بينا وبين الاشياء ,حاجة تانية
.... لا برضه مش بمقدار الضوء الساقط ع الاشياء دى , اخرج بس من حصة الفيزيا دى
وانت هتفهمنى
هفكرك بحاجة وانت صغير كنت بتتخيل حجم المدرسة بتاعتك
كبيير ازاى , وان السور عااااالى ,خدت بالك لما كبرت المدرسة كانت طبيعية والسور
مش عالى قوى بالنسبة لحجمك وانت طفل وقتها ,طيب شكل العربيات والاوتوبيسات ,
صراحة انا سرحت فى الموضوع ده "سيكا" كدة وال-سيكا-
هى وحدة زمانية تقدر بحوالى 3 ثوانى
, وحسيت ان
نظرتى للاحجام والاطوال وانا صغنن كانت كبيرة اوى مقارنة بحجمى الطبيعى , يعنى كنت
بحس ان كًبس النور عالى وبجيبب طبق واقف عليه , لما بشوفه دلوقتى واقدر حجمى وانا
صغير الفرق مش كبيير اوى زى مانا كنت بشوفه , خدت واديت مع اصحابى كدهون فى
الموضوع ده ولقيت نفس النتايج تقريبا ,"تأمل عزيزى المتابع "
مضمون النظرية
فاكرين ان احنا كنا خدنا زمان حاجة اسمها مقياس الرسم او ال"Scale " اللى هو بيعنى : ان حجم الاشياء ع الخريطة اصغر من حجم الاشياء فى الواقع
شكل (3-1)
وده اللى كان بيخلينا نشوف الكورة الارضية
سبع قارااات "راجع كتاب الدراسات" فى ورقة كتاب A4
انا بقى حسيت ان فى علاقة عكسية ما بين احجامنا وما بين
نظرتنا للاشياء , يعنى طول ماحنا صغيرين مستكبرين الحاجات اوى ,كبرنا وقدرنا حجمنا
الطبيعى , الحاجات بتتفه فى نظرنا وبتصغر
الموافق يوم السبت اللى بعد احداث العباسية وفض الاعتصام هناك بالقوة المفرطة واعتقال المئات من المعتصمين وغير المعتصمين
تابعت احداث الاعتقال العشوائي لكل الناس وتابعت اقتحام مسجد النور بالبيادات وكلمت اصحابى من اللى كانوا موجودين هناك ووصفولى قد ايه الوضع كان مأساواى وقد ايه الضرب والسحل والاعتقال كان بطريقة مبالغ فيها
وخرج بيان من المجلس العسكرى عن الاحداث
تانى يوم اتوجهت دعوة من شباب حر لعمل وقفة سلمية تماما قدام س28 اللى هى (مجمع النيابات والمحكمة العسكرية شرق) روحت زى اى حد دمه محروق ومستنى يعرف مصير كل اللى اتاخدوا واللى عرفته بعدها ا كان فى فعلا اهالى ناس مستنين امل انهم يشوفوا ولادهم خارجين يومها
خلصت شغل وطلعت ع هناك اتاخرت لان كانت الوقفة بدات
لسوء حظى موقفتش غير دقايق وبعدين لقيت هجوم غبى من افراد الشرطة العسكرية المكلفين بحراسة الوحدة محاولتش اجرى متخيلتش انهم بالغباء انهم يقبضوا على ناس تانية بعد اللى عملوه امبارح بس فعلا ده حصل قبض عليا ملازم اول ودخلنى الوحدة وكان كل اللى يشوفنى معاه كان يضربنى من غير حتى مايعرف اى حاجة بالعصيان, بالايدين, بضهر السلاح فى بطنى ووشى, وبعدها خدوا مننا التليفونات من غير مانلحق نبلغ اى حد ان اننا اتقبض علينا دخلت لقيت اتنين واحد مضروب ومفتوح دماغه جرح قطعى حوالى 4سم (احمد مجدى ) والتانى شاب باين عليه صاحبه (عبد الحميد ابو زيد ) حاطط ايده ع الجرح وكابس الدم هما الاتنين كانوا متكلبشين ورا ضهرهم طلعت منديل مسحتله وشه وغسلته وبعدها دخل علينا كام عسكرى على كام ظابط فضلوا يضربوا فينا اكتر من ساعة ولا رحموا اللى سايح فى دمة ولا حتى رحموا انه متكلبش مش عارف حتى يصد الضرب عن نفسه
بعدها دخلنا للظابط اللى عمل المزكرة خد مننا كوول حاجة كانت معانا انا كان معايا شنطة شغلى فيها اللاب توب على كام كتاب لبلال فضل ومزكرة وحاجات عادية يعنى هما حولوا كل حاجة فيهم الى جريمة واتضربت بسب انى معايا كتاب لبلال فضل ده غير الشتيمة اللى الراجل خدها بسبب انى بحبه وشايله كتاب ده بالاضافة للضرب والاهانة العادية يعنى
بعدها على طوول اتكلبشنا احنا التلاتة مع بعض و طلعنا للنيابه عشان تحقق معانا دخلنا غرفة كدة فيها حوالى 50 واحد من اللى لسة متحققش معاهم واتقبض عليهم فى العباسية حالة الناس من كتر الضرب وانهم مرمين هنا من امبارح محدش سال فيهم ولا حد يعرف عنهم حاجة تخليك مرعوب من مصيرهم ومصيرك اللى اتربط معاهم حاول حد يهدينى ويقنعنى ان توترى ملوش لزمة بس من غير فايدة
بعدها دخل 7 كمان عرفنا انهم اتمسكوا برضه من قدام النيابة بعد ماحنا اتقبض علينا ومصيرهم بقى زى مصيرنا
بالصدفة البحته لقينا محامية حقوقيه عبد الحميد كان يعرفها : فاطمة سراجمن جبهة الدفاع ودخلت معانا التحقيق اتحقق معايا وانكرت كل التهم المتوجهة ليااللى هى " رشق بالحجارة واعتداء بالسب واستخدام القوة وتكدير السلم العام وكل الكلام ده.... ,وكذلك اتحقق مع عبد الحميد واحمد وبعدها سيبنا الناس التانية ونزلنا احنا التلاتة متكلبشين عشان نترحل ع السجن !!
نزلنا تحت ولقيت عدد اكبر بكتيير اوى من اللى كانوا فوق حوالى 200 واحد قعدت اتكلمت مع كام واحد فيهم ويسألونى
حد برة حاسس بينا ؟؟ حد برة عارف ان احنا هنا ؟؟
شوفت اللى اتاخد هو ووالده, وشوفت اللى كانت مراته بتولد فى المستشفى التخصصى وهو سابها وراح يصلى العصر اتمسك , وشوفت اللى عربيته سخنت ركنها نزل يملى مايه حصل اللى حصل ومعرفش يخرج م المسجد واتمسك , والله الحكايات دى بجد من لسان اللى حكوها
بعدها بشوية بدات عربيات الداخلية تيجى وتترص وبدأو يسلمو كشوف اسمائنا ليهم
احنا التلاتة خدونا ودخلونا اوضه كدة وبعدين طلعنا منها ع ناس شكلهم غريب لابسين مدنى وبيحققوا معانا بنفس اسلوب امن الدولة اللى كنا بنسمع عنه, اسئلة اسئلة اسئلة من غير ولا فرصه انك تجاوب اصلا.. عرفنا انهم تقريبا تحريات عسكرية
خلصنا معاهم وفعلا طلعنا ع عربية الترحيلات وماادراك حالة الناس فى عربية الترحيلات من وقتها حسيت ان انا مستقبلى ضاااااع
متكلبش ومتوجهلى تهم تودى فى داهية ورايح اتسجن زى المجرمين ومحدش حاسس بينا ولا عارف ايه اللى جرالنا !!
عربية الترحيلات فيها حوالى 30 واحد مكتومة وريحته زفت ومبيدخلهاش نسمة هوا كنا هنموت مخنوقين ساعتها احمد انهار وقعد يعيط محد فينا عرف يهديه!
العربية ودتنا سجن طرة الاستقبال بعد ماكانوا قايلين اننا رايحن الاستئناف اللى هو اعتقد فى باب الخلق
وفعلا كان فى هناك استقبال ومن النوع الجامد لان واضح ان كان متوصى ع "بتوع العباسية " زى ماكنوا مسميناه فى السجن جااااامد اوى نادوا عل الاسامى ودخلنا اوضه تغيير الهدوم وابتدا ضرب متخلف من حوالى 25 واحد فى الاوضه بالاقلام والحزام على اجسام الناس وهى بتقلع لا بيرحموا كبير ولا عيل صغير
ولبسنا البدلة البيضه, ودخلونا اوضه تانية فوجئت فيها بكام مسجون ماسكين مكن حلاقة وبيحقلوا للناس ولسة هقول للظابط مش من حقوا تحلقوا لنا لقيت القلم ع قفايا من هنا, اللى فهمته ان اكتر حاجة بتضايقهم انك تقوله انا من حقى كذا انت تقولها من هنا وهتلاقى الحق معلم بصوابعه الخمسة على قفاك
اتحلقلنا حلاقة خرفان حتى انهم محترمووش دقون الناس الكبيرة ولما فى واحد اسمه الشيخ حسن قاله بلاش دقنى بالله عليك قام سأل المسجون الظابط :ياباشا مش عاوز يحلق دقنه ؟؟
رد الظابط :احلقله ابن المرة معندناش شيوخ هنا !
والله الناس كانت بتعيط وهى حاسة انها بتتعامل زى الخرفان وضيف على كدة انهم حتى مأجرموش حتى عشان يتعاملوا المعاملة دى
خدوا مننا الحاجة والهدوم والفلوس وكل حاجة وبعدين وزعونا ع الزنازين طالعين حافيين, والشعر مالى هدومنا, واللى كان متعور-احمد- فضل ينزف طووول اليل فى الززانة لغاية مالنزيف وقف لوحدة
دخلنا زنزانة 7 فى عنبر أ تقريبا 3 متر فى 3 متر وكان عددنا 13 واحد كل مننا خد ركن وحاول يترمى فيه
وصف الزنزانة
الزنزانة اسمها زنزانة الدواعى (زنزانة مشددة )
مفيهاش نور : كنا بنصحى لما النهار يطلع وننام المغرب
مفيهاش مياه : كانت الميه تتطلع مرتين تقريبا كل مرة 10دقايق مرة قبل الفجر ومرة على قرب المغرب
وطبعا مفيهاش فرش ونايمن ع البلاط
فيها ازازتين مايه نشرب ونتوضى وندخل بيهم لامؤاخذة الحمام
الزنزانة متتفتحش ولا نخرج منها خالص
تتفتح مرة الصبح يرمولنا الفطار وبعدها بكام ساعة يرمولنا الغدا
وصف الاكل
معروف عند اى واحد شاف فيلم في سجن قبل كدة او اتحكالوا تجربة اكل السجن عامل ازاى ,الحقيقة اصعب بكتيير
الراجل خبط علينا الصبح راملنا الفطار
كام رغيف عيش كدة لازقين فى بعض وع قد عددنا اكياس حلاوة وعلبة جبنة وخيارتين وطماطماية واحدة صغيرة .. ااه و 3 برتقانات مش عارف صراحة ايه الفكرة فى الاعداد دى وفين النسبة بين الموجودين وبين الفطار
ع الساعة 1 تقريبا لقيناه بيخبط
الشيخ محمد " مسجون مسؤل عن الاكل " : هاتوا اطباق الاكل
انا : معندناش اطباق
الشيخ محمد : طيب هاتوا كييس
انا : مفيش اكياس هنا احنا اول يوم لينا هنا
الشيخ محمد : طب استنوا بقى للاخر ادورلكوا
راح وجه جايب لنا كرتونة كبيرة كدة ومالاها رز وحط فوق الرز فاصوليا بيضه وبعدين جاب علبة حلاوة وحط فيها فاصوليا زيادة يعنى
والاكل زى ماجه زى ماترمى
تانى يوم كانوا جايبين فوول وادونا لحمة بس برضه حتى اللحمة زى ماجت زى ماترمت لان ريحتها متشجعش خاااالص
احوال الناس جوة الزنزانة
كان معانا 10 غيرنا احنا ال 3 مجموعنا 13
اساميهم : عم حسن بهجت ,عم محمد,عم ياسر,عم مسعد ,دكتور احمد (دكتور علاج طبيعى ) ,علاء الدين , احمد محمد (22 سنة تقريبا ) , محمد (الصغير ) 15 سنة , عم ابراهيم (سواق تاكسى من امبابة ),عم السيد (ده كان مضروب لدرجة انه مكنش بيصحى ولا بيتكلم ومعرفناش عنه اى حاجة )
معظم الناس دى ماعدا احمد وعلاء اتمسكوا فى جامع النور وهما بيصلوا عادى ضحكوا عليهم وقالولهم هنأمن خروجكم لغاية ماتعدوا الضرب ونسيبكم
كل الناس دى غلابة وملهاش وسايط غير ربنا , ناس والله على درجة من الطيبة والرضا غير طبيعية
عم حسن ده محفظ قران وهو اللى كان بيصبرنا وانا ماشي مبقاش عارف يقولى اسم او رقم حد اكلمه عشان يخرجه
عم ابراهيم ده سواق تاكسى لما سألته عاوز ايه ياعم ابراهيم اكلمك مين قالى متشغلش بالك ربنا كبير
دكتور احمد كان صوته حلو فى القران وبدا اضراب عن الاكل والشرب كمان لما شاف حالة امه فى الزيارة واخر يوم ليا كانت حالته صعبه اوى
عم مسعد راجل بياع فراخ فى بنها وكان جاى هنا زيارة وادانا رقم بيته نكلمهم
عم ياسر معرفش هو كان ايه برة بس برضه مطلبش منى غير انى مسكتش عنهم
احمد محمد ده شاب اسكندرانى وكان جاى يدور على شغل وكلمت اهله لما خرجت وعرفتهم مكانه مع انه كان رافض عشان ميتعبش حد معاه
محمد الصغير ده ولد اتمسك وهو فى صلاح سالم وكان بيسأل الشرطة العسكرية اروح ازاى عشان بيقولوا فى قلق ف العباسية دخل الوحدة يسأل الظابط مخرجش وهو تقريبا فى 3 اعدادى وكان امتحانه فاضله كام يوم
عم محمد كان موظف فى شركة سياحية بس الشركة عرفت موضوعه وبعتتله محامى
علا الدين :قالى ربنا كبيير وكان عنده امل يخرج ونزل جلسة استئناف ورفضوا اخلاء سبيله عشان هو للاسف مش طالب ولا ليه حد يعرفه .
جلسة الاستئناف
يوم الثلاثاء الصبح ندهوا على اسامينا احنا التلاتة عشان عندنا جلسة استئناف نزلنا سوا وقعدونا فى قفص كبير كدة مع باقى مساجين هيترحلوا برضه على محاكم , بعدها بشوية ابتدوا ينادوا ع اسماء الناس ومجموعة مجموعة خرجوا , الغريب قوى ان الناس دى كانت لطيفة جدا وغلابة جدا وفى منهم شكلهم محترم جدا ,على عكس ماكنا واخدين فكرة عن احوال المساجين جوة واللى بيعملوه ,كانوا بيعزموا علينا بسجاير ويقعدوا يطمنونا ويدعولنا اننا نخرج ,المهم كله خرج ماعدا احنا التلاتة وواحد تانى اسمه مصطفى من اسكندرية على حسب حكايته هو : انه اتمسك من الشرطة العسكرية فى شهر مارس 2011 فى اسكندرية وكان معاة مطواة , عشان كان لسة اياميها فى قلق والناس مش بتمشي غيربسلاح -على حد وصفه- وحكموه عسكرى وخد 15 سنة سجن فى تهمة سرقة بالاكراه !!
كنا متوترين قوى وصلينا ركعتين جوة القفص قضاء حاجة لله,
بعدها جابولنا شباب نلبسها عشان مينفعش نروح المحكمة بشكلنا ده ,وبعدين جابولنا الحلاق عشان يظبط الزيادات اللى كانت فى شعرنا , واللى كانت هدومة مش نضيفة جابوله بدلة سجن تانية ,طبعا كل ده عان يتقال انهم بيعاملوا المساجين احسن معاملة
اتكلبشت انا ومصطفى ,وعبد الحميد واحمد سوا ,ولما ركبنا عربية الترحيلات المخبر فك الكلبشات وعرض علينا لو حد عاوز يكلم اهله , اخدت منه الموبايل وكلمت صاحبي وكنت متخيل انهم ميعرفوش اى حاجة عنى من 4 ايام ,عرفت انهم واقفين مستنين عند المحكمة
وصلنا المحكمة نزلونا وطلعنا على القاعات مع عدد كبير قوى , وبعدين طلعوا اهالينا ورانا وكانت اول مرة اشوف والدتى من ساعة القبض عليا
دخلنا للقاضى ونظر فى كل الطلبات المتقدمة ورفع الجلسة للحكم واستنينا اكتر من ساعة الحكم , كله كان بيأكد ان الطلبة والصحفين والمراسلين واللى من حركات واللى ليهم واسطة هيخرجوا اخلاء سبيل .طيب والباقى ؟؟ ربنا يتولاهم .. بعدها وصل القرار باخلاء سبيلنا ,فرحنا جدا وقالوا لازم نرجع السجن ونمشي من هناك وعشان الوقت اتاخر ممكن نبات ونمشي الصبح ,رجعنا ع السجن متكدرين ومتضايقين جدا,مكسوفين نورى وشنا للناس اللى معانا فى الزنزانة ,
فعلا رجعنا السجن متاخر ومكن ينفع نمشى , فتشونا وطلعنا فوق , الناس فرحوا عشانا جاامد جدا واستنينا النهار يطلع عشان نروح , بعده مش بكتيير طلع مخبر سألنا ع مواعيد امتحانتنا ونزل وطلع قالنا يالا عشان هتروحوا دلوقتى !
نزلنا وروحنا مع الظابط عشان نسأل على هدومنا اللى خدوها الظابط قالنا الهدوم كله حرقناها !!
لحسن الحظ كنت جايب معايا بنطلون وقميص لبستهم وعبد الحميد دور ع قميص وبنطلون من وسط هدوم المساجين ,واحمد خد تيشرت برضه ومشى ببنطلون السجن , طلعنا بعده لقينا صحابنا مستنين برة , سلموا علينا وبعدها كلمنا اهالينا نطمنهم , وفضلنا نهتف قدام السجن يسقط يسقط حكم العسكر ,عمر السجن ماغير فكرة :)
الناس اللى جوة دى كل همها انى لما اخرج مسكتش عن اللى بيحصل لهم جوة وانه مينفعش اتنين يتمسكواظلم وفى نفس الموقف واحد يخرج عشان طالب ولا مسنود والتانى لا عشان معندوش غير ربنا وهو رب اسرة وفى كوم لحم متعلق فى رقبته ..
ازاى فى قضاء لسة بيحكم بالاسلوب ده وهما ايات القران مزينين بيها كل المحاكم والقاعات "واذا حكمتم بين الناس ان تحكموا بالعدل "
الحرية لكل مظلوم..الحرية لكل واحد بيطلب حقه فى بلدنا اللىضايع فيها الحق ..الحرية لكل المحاكمين عسكري.
من فترة كبيرة كان دار بينى وبين احد صديقاتى الاعزاء ع الفيسبوك حوار عن تطور صفقة الاخوان مع العسكرى واللى مكنش يخفى ع حد ابدا بداية الصفقة دى واللى انا بعتبر تاريخها من بداية حكومة شرف الاخوان وقتها كانت الجهة الوحيدة تقريبا اللى كان المجلس بيتحاور معاها ..وده لان المجلس اعتمد فى سياسته على مبدأ "شيلنى اشيلك " عشان وقتها كانت اكتر قوة تقدر تحشد لاى مظاهرة او مليونية كانوا هما الاخوان المسلمين امثال جمعة طورا بورا ..المجلس من وقتها اشترى دماغه وببساطة شديدة اوى هما كمان باعوا القضية بالرغم من ان ناس كتيير اوى التمست للجماعة العذر بحجج انعزالهم عن الحياة السياسية يزيد عن 80 سنة وتعرض كل القيادات والكوادر فى الجماعة الى اضطهاد بين فى العهد القديم حتى جاءت الانتخابات وكان نظام الانتخاب واعادة تقسيم الدوائر هو افضل ما يمكن ان يكون للجماعة "ده لو كان المرشد هو اللى هيختار مكنش عمل كدة" ونرجع تانى نزكر المبدأ الجليل اللى المجلس اعتمد عليه "شيلنى اشيلك " مكنتش الانتخابات والاغلبية الساحقة ببلاش وكان المقابل انعقاد مجلس الشعب لاكثر من 3 اسابيع تقريبا حصل خلالها مجازر ومصايب منيلة " احداث السرقة بالاكراه ,احداث السطو المسلح , مذبحة بور سعيد , احداث محيط وزارة الداخلية " ولم يذكر المجلس المو"ك"ــر سيرة المجلس العسكرى غير ببرقية شكر على حمايته لثورتنا الغراء وادينا اهو ادام تطور جديد لصفقة العسكرى والاخوان يأتى حول اختيار مرشح للرئاسة فاذا كان مجلس الشعب تمنه بيع حق الناس اللى ماتت والسكوت على مدبر ومرتكب كل المهازل اللى حصلت مش عارف بقى ايه ممكن يكون تمن صفقة رئاسة الجمهورية؟؟ عسكر كاذبون..اخوان معرصون مصادر: مشاورات بين «الإخوان» و«السلفيين» و«العسكري» للتوافق حول مرشح للرئاسة
