نظرية : الحبة قبة

                                 نظرية : الحبة قبة 

مقدمة

عزيزى قارئ النظرية , هل تعلم ان نظرتنا للاشياء بتختلف بـ............

لالالالا مش بالمسافة بينا وبين الاشياء ,حاجة تانية .... لا برضه مش بمقدار الضوء الساقط ع الاشياء دى , اخرج بس من حصة الفيزيا دى وانت هتفهمنى

هفكرك بحاجة وانت صغير كنت بتتخيل حجم المدرسة بتاعتك كبيير ازاى , وان السور عااااالى ,خدت بالك لما كبرت المدرسة كانت طبيعية والسور مش عالى قوى بالنسبة لحجمك وانت طفل وقتها ,طيب شكل العربيات والاوتوبيسات ,

صراحة انا سرحت فى الموضوع ده "سيكا" كدة وال-سيكا- هى وحدة زمانية تقدر بحوالى 3 ثوانى

 , وحسيت ان نظرتى للاحجام والاطوال وانا صغنن كانت كبيرة اوى مقارنة بحجمى الطبيعى , يعنى كنت بحس ان كًبس النور عالى وبجيبب طبق واقف عليه , لما بشوفه دلوقتى واقدر حجمى وانا صغير الفرق مش كبيير اوى زى مانا كنت بشوفه , خدت واديت مع اصحابى كدهون فى الموضوع ده ولقيت نفس النتايج تقريبا ,"تأمل عزيزى المتابع "

مضمون النظرية

فاكرين ان احنا كنا خدنا زمان حاجة اسمها مقياس الرسم او ال"Scale " اللى هو بيعنى : ان حجم الاشياء ع الخريطة اصغر من حجم الاشياء فى الواقع

شكل (3-1)

وده اللى كان بيخلينا نشوف الكورة الارضية سبع قارااات "راجع كتاب الدراسات" فى ورقة كتاب A4

انا بقى حسيت ان فى علاقة عكسية ما بين احجامنا وما بين نظرتنا للاشياء , يعنى طول ماحنا صغيرين مستكبرين الحاجات اوى ,كبرنا وقدرنا حجمنا الطبيعى , الحاجات بتتفه فى نظرنا وبتصغر

قانون النظرية

الاحجام والاطوال والاجسام – تتناسب عكسيا مع – السن والنمو والنضج

تطبيق النظرية

يكفى بس انك تدرك ان اى حاجة انت شايفها كبيرة وصعبة وعالية عليك انك مع الوقت والنضج والخبرة ,كل ده هيهون فى نظرك ويبقى لاشئ .

بلاش تعمل م الحبة قبة